DEBEKUAREN ETA ERABILERAREN ARTEKO EZTABAIDA
Mugikorrak gure bizitzetan sartu zirenetik era esponentzialean areagotu da horien erabilera, eta hurbilekoekin komunikazioa, informazioa eta zereginak erraztu dizkigute. Ahalmen hori txikienengana ere iritsi da, eta behar bezalako kontrolik gabe haien garapenari kalte handia egin diezaiokeen mundu bat ireki da. Telebistek eta gero ordenagailuek aurreko belaunaldiei mundu digitala ireki zieten eta aukerak zabaltzeko eta ideiak kontrastatzeko espazioa kendu zieten familiari, hezitzaileei eta lagunei. Alabaina, mugikorren edota gailu pertsonalen munduak espazio pribatu bat sortzen du, non kontrolik gabeko nabigazioak mezu nahasgarriak helarazten dituen garapen-fasean dauden buru horientzat.
Gizartea eta erakundeak errealitate berriaz arduratuta daude, eta erronka berriari aurre egiteko konponbideak bilatzen ari dira. Datuen babesaren agintariak lanean daude txikienek mugikorrean pasatzen duten denbora mugatzeko, eta horretarako gurasoei lagungarriak izango zaizkien jarraibide batzuk zabaldu dituzte.
Aholkuen artean, adierazi da beharrezkoa dela jarraibideak ezartzea mugikorra emateari dagokionez; esate baterako, adingabeari azaldu behar zaio bere eguneroko bizipenetatik at dauden arriskuak daudela sareetan, eta kritikoa izan behar duela jasotako informazioaren eta horren egiazkotasun-mailaren artean. Hala ere, denok dakigu azalpena ez dela nahikoa, eta jarraibideak ezarri behar dira bere adinerako egokiak ez diren web-aplikazioak eta -edukiak erabiltzeko, eta gaitzeko edo blokeatzeko orduei buruz.
Neurri horiek guztiek ez dute ordezkatzen ondorengo kontrola, eta interes zintzoa adierazi behar da dituzten elkarrizketei, txatean solaskide dituzten pertsonei nahiz bidaltzen eta jasotzen dituzten bideoei dagokienez. Eurentzat naturala izan daiteke, baina helduek jakin behar dute txikiek gailuekin zer egiten duten.
Dena dela, arauak dituen eta gailurik erabiltzen ez duen familia-jarduera izugarri atsegina izan daiteke, betebeharretan, debekuetan eta eginkizunetan oinarritutako elkarrizketak bezain beste; beraz, alde negatiboan zentratzeaz gain, ona da eremu seguruak eta gozamenekoak sortzea, eremu elektronikotik kanpokoak.